రోహిత్, రికెల్టన్ విధ్వంసం.. భారీ లక్ష్యాన్ని ఊదేసిన ముంబై

ఐపీఎల్ 2026లో భాగంగా వాంఖెడే స్టేడియంలో జరిగిన భారీ స్కోర్ల మ్యాచ్ లో ముంబై ఇండియన్స్ ఘనవిజయం సాధించింది. లక్నో సూపర్ జెయింట్స్ నిర్దేశించిన 229 పరుగుల భారీ లక్ష్యాన్ని మరో 8 బంతులు మిగిలి ఉండగానే 4 వికెట్లు కోల్పోయి ఛేదించింది. ఓపెనర్లు ర్యాన్ రికెల్టన్ (32 బంతుల్లో 83), రోహిత్ శర్మ (44 బంతుల్లో 84) వీరవిహారం చేసి ముంబై విజయాన్ని సులభతరం చేశారు.

టాస్ గెలిచి బౌలింగ్ ఎంచుకున్న ముంబై ఇండియన్స్‌కు లక్నో బ్యాటర్లు చుక్కలు చూపించారు. ముఖ్యంగా నికోలస్ పూరన్ (21 బంతుల్లో 63; 1 ఫోర్, 8 సిక్సర్లు) విధ్వంసకర ఇన్నింగ్స్‌తో స్కోరు బోర్డును పరుగులు పెట్టించాడు. అతనికి మిచెల్ మార్ష్ (44), హిమ్మత్ సింగ్ (40 నాటౌట్) తోడవడంతో లక్నో నిర్ణీత 20 ఓవర్లలో 5 వికెట్ల నష్టానికి 228 పరుగుల భారీ స్కోరు చేసింది. ముంబై బౌలర్లలో కార్బిన్ బాష్ రెండు వికెట్లు తీశాడు.

భారీ లక్ష్య ఛేదనలో ముంబైకి ఓపెనర్లు రోహిత్ శర్మ, ర్యాన్ రికెల్టన్ అదిరిపోయే ఆరంభాన్నిచ్చారు. వీరిద్దరూ తొలి వికెట్‌కు కేవలం 10.5 ఓవర్లలోనే 143 పరుగులు జోడించి మ్యాచ్‌ను లక్నో చేతుల్లోంచి లాగేశారు. ముఖ్యంగా రికెల్టన్ 8 సిక్సర్లతో విరుచుకుపడ్డాడు. వీరిద్దరూ ఔటయ్యాక తిలక్ వర్మ (11), సూర్యకుమార్ యాదవ్ (12) త్వరగానే పెవిలియన్ చేరినా, నమన్ ధీర్ (23 నాటౌట్), విల్ జాక్స్ (10 నాటౌట్) మిగిలిన పని పూర్తి చేసి ముంబైకి అద్భుత విజయాన్ని అందించారు.